森記茶餐廳

考車牌

森記 — Fri, 11 Dec 2009 13:42:46 +0000

姪仔一個月前開始學車, 搵師傅教之餘, 我也親自教了他兩次。姪兒方向感和空間感都好, 也很小心, 所以有一個安全駕駛者的基本條件, 只需多練習便可。昨天他考車, 一次便 pass 了, 在此恭喜他攞到車牌。

話題一轉, 自己咁大個人, 做個「十分」引以自豪的事, 其實只得幾件, 而小弟的考車經歷, 便是其中一件。在自己的 blog, 就讓我自戀一吓想吓當年吧。

那時小弟還是學生, 開始學車以方便將來到其他城市找工。那時窮學生一名, 冇錢搵師傅, 朋友間也只是俾面久不久教吓我。後來有位朋友, 有部超舊、殘到唔敢出 freeway 的汽車, 說無條件給我學車之用, 但他卻冇時間教我。於是小弟便用此車自學, 真係有點無師自通。不過也因為咁, 一次小弟獨自學車, 發生了輕微碰撞, 幸好對方可憐小弟, 收我 50 蚊了事。

到考車那天, 是一次便 pass 了, 否則也唔會攞出來寫。但有樣嘢連我自己都估唔到, 那個車試, 小弟是攞滿分的。還記得考完入去登記, 個職員舉起我的車試成績單, 大大聲說: 「Hey, he gets 100.」之後甚至有人拍掌。呢個是十幾年前的事了, 但那張車試成績單, 小弟還放在相部上的, 哈哈。

一山還有一山高

森記 — Mon, 07 Dec 2009 17:55:59 +0000

雖然我公司前景不明朗，卻是實實在在地請人，而且應徵者絕對不少，過去三個星期，我面試以下人選。

第一個，碩士生剛畢業，成績好又做過有關我們需要的科技研究，好 sharp，應該勝任呢份工。不過，如此條例的人，現在通街都係，所以老細決定再睇多幾個。

第二個，名校博士生將畢業，成績好是多個論文的首席作者，面試時，他給我的印象是「十分聰明，大有前途」。不過，他工作經驗不足，面試時熱誠不夠，老細唔多鍾意。

第三個，名校博士生將畢業，也是多個論文的首席作者，曾有十多年工作經驗，不過他英文口音勁重，我地成組都聽不明他說什麼，所以 ….

第四個，在職近二十年，剛失業在找工，是一返工便可做嘢的人。不過，他的知識太專，也沒有什麼標青事跡。

第五個，在職十年也是剛失業，他在舊公司一直是 top 10% 的職員，是代表公司參加 industry committee 的人，實力強勁，只因成組被 cut 所以被迫搵工。不過他不在 Valley 又不想 relocate, 老細不太喜歡。

我地只有一個空缺，你話點請好呢？見完多路人士，我的感覺是，一山還有一山高，搵食艱難呀。

擦鞋

森記 — Sun, 29 Nov 2009 15:35:31 +0000

上個禮拜, 同「F細」, Director L, 和兩位經理開一個特別會議。討論到一個問題, F細又開始發火, 最後竟然夠薑到當面批評 Director L, 說: 「你之前的一個決策是錯誤的。」我嚇到呀, 幾驚 L 反臉, 不過佢修為夠不動氣, 繼續開會。

F細一向是有嗰句講嗰句, 對事不對人, 雖然我有時要同佢撐恆, 但我是十分尊重他的。而小弟, 就真係冇佢咁夠薑, 同老細私下傾談時, 會多讚老細做擦鞋仔。當然唔係亂擦, 要擦得實有其事。

自己個組方面, 因為小弟掌管三大事項 (工作分配, 向上級會報 status, 開會議程), 所以呢, 近來也多了人向我擦鞋, 因為我有權給他真接好處。俾人讚是開心的, 但不能被此沖昏頭腦而影響工作決定, 要做對全組有利的事。

應對公開批評

森記 — Mon, 16 Nov 2009 20:45:59 +0000

上星期在 Director L 的 staff meeting, 有一個循例的 project 進度檢討。每個項目的 Lead 要說說自己項目的情況，呢家嘢小弟本來駕輕就熟，想不到也要出一額汗。

話說每人輪流去講，到我講完，點知 F 哥的舊老細 ( 簡稱 F細）批評我的其中一個決定。站在純技術方面作考慮，他的批評有一定道理，但我解釋，我作如此的決定是有如此這般的人事考慮。我同時望望 Director L，他點頭認同。想不到「F細」什不開心，將話題扯到冇雷公咁遠，講東講西，最後更加批評「人人都覺得我負責的產品是癈的」。

這個批評明顯誇張冇人會信，但呢個 statement 殺傷力太大，我必須立即表明立場，不認同他所說的。我說除了他之外，從未聽過有人下如此指控（暗示他老作）；之後舉出例證，說出產品這半年來所得到的成果，這有數據支持是不可否定的。

F細當然唔會咁易放過我，窮追猛打說出產品的幾個弱項，有些又係事實噃。呢個時候，如從前的 blog 提個，總有人會加入戰圈暗踩一兩腳，我開始被圍摳，情況絕不樂觀。幸好，小弟平時賣口乖的功德開始發生因果，經理「阿宗」插口嘗試打圓場。此機會一瞬即過我立即找緊，支持「經理宗」的見解，先埋他堆，再多謝「 F細」給與的「意見」，之後說出幾個具體措施去改善情況。 Director L 靜了許久終於肯出聲，說這樣不錯，好啦說下一個 topic。

開完會後，F細拉我到一邊說有嘢要同我傾，Director L 又企係度聽埋一份。我以為又要應戰，點知F細說的完全九唔搭八，是一件小事情，和開會時說的一D關係都冇。我心諗，F細搞邊科！？噢，明白了，原本他想打圓場，好的我說會搞點它。返到 office 我第一時間完成呢件小事情，寄個電郵俾佢再加埋 Director L，不一會F細便回個 Thank You 電郵了，事情暫且告一段落。

MJ’s This Is It

森記 — Mon, 09 Nov 2009 09:01:08 +0000

剛剛睇完 MJ 的 This Is It, 成年冇入過戲院, 今晚專登抽時間去睇。好好睇, 好好聽, 一氣呵成冇冷場。 MJ 好 fit, 又跳又唱, 充滿活力一 d 都唔似 50 歲。成套紀錄片, 演唱會的幕後花蕠只起穿連作用, 主菜仍是 MJ 的歌。都是他演習時的現場錄音, 但質素仍十分好。經典歌一首接一首, 壓軸 Billie Jean solo 跳舞, 完場 Man in the Mirror。一代傳奇, 留下最好一面給喜歡他的人。

美國輿論形容 MJ 是第一個黑人歌手, 能得到全國白人的認同和喜歡。我覺得不止如此, 他的音樂紅遍全世界每個地區, 更是大人細路都啱聽。能唱歌, 能作曲, 能寫詞, 能跳舞, 更創出風格強烈的音樂和形象, 我諗已是一個音樂人的最高境界了。

我自己鍾意 MJ 是由他的慢歌開始, 最鍾意是 Man in the Mirror, Heal the World 也很鍾意，佢早期的 I’ll be there 也好好聽。

萬聖節趣事

森記 — Sat, 31 Oct 2009 05:38:18 +0000

今日阿女返學, 好開心咁穿起她的「小蝴蝶」妝扮。去到學校, 班小朋友個個都著到有型有款, 但見其中一個打扮成海盜的, 則俾一班小朋友圍攻, 算佢唔好彩。我自己呢就冇打扮啦, 一向對扮嘢興趣不大; 不過講開又講, 自己對上一次打扮是數年前, 在一個蚊型話劇, 我是要扮女人的, 真係世事難料呀。

又記得來到美國的第一年, 那時住在一個美國人的寄宿家庭。一天, 有人按鈴, 我去開門, 竟見到一班打扮恐怖的小朋友, 向我說了一段聽唔明的英文。那時我大鄉里英文又差, 完全唔知發生什麼事, 以為見鬼立即關門。之後回去說給 host mom 知, 她笑說那是 Holloween trick or treat, 把門口的糖分給他們便是了。 Oh … 小朋友們, 真的不好意思啊。

十週年

森記 — Sat, 10 Oct 2009 17:10:30 +0000

今天是跟太太十週年紀念, 以此 blog 作個紀念。

十年前, 那時跟 Felix 同一間公司, 我對他說, weekend 會飛去 Seattle 註冊結婚, 他好像有點錯愕, 那時跟他未算熟絡, 不過咁大件喜事, 點都要捉個人來講吓啦。那年是 1999, 本來想 9月9日註冊的, 唔記得點解, 最後冇揀到那天, 卻楝了十全十美的好日子。雖然我地冇擺酒冇 party, 不過註冊儀式一樣記憶尤新, 那個法官好搞笑。

十年變化很多, 多了孩子, 房子, 學位, 白頭髮, 脂肪 … … 工作上仍是今日唔知聽日事, 這是唯一冇變的。

一位老人家

森記 — Thu, 10 Sep 2009 06:13:38 +0000

剛剛收到消息, 一位我什敬重的長輩, 在澳門過身了, 特以此 blog 記念他。

他是我的姨丈, 也和我們同住一間大廈, 由我細細個開始到現在也是。眾多親人當中, 他是對我特別好的一個, 每次見我只有讚沒有彈, 一向有是笑面對人的。但試過一次, 可能他心情不好, 卻無端向我和媽媽大發脾氣, 我當時呆了不懂反應, 只是默不作聲。他可能醒覺自己過份了, 後來態度媛和, 多年以後, 他有意無意提及此時, 暗示他的歉意。雖然我一直不確定他那次發火的原因, 但人總有情緒失控之時, 所以我沒有因此對他反感, 只可惜此事太深刻一直無法忘記。

點到好, 我們時有來往, 五月回澳時我才拜訪他, 那是他還精神奕奕的。想不到是突然發現到了癌症未期, 還未弄清是怎麼一回事便去了…

陪君如陪虎

森記 — Tue, 25 Aug 2009 17:58:22 +0000

今朝一返工收到 Director L 的電話留言，叫我上去見佢。這有點不尋常，我帶著戰戰兢兢的心情去佢辦公室，一入去他叫我關門坐低，一面凝重的說：「Mr.P （我前任老細）辭職了，因為穆哈默（我現任老細）還在放假，你可否代為轉告他的組員，特別是之前隸屬 Mr.P 的。。。還有，請準備一個 farewell lunch.」

原來只是叫我做嘢，嚇得我呀。不過，Mr.P 的辭職，其實是 Director L 一手設計，這兩人關係微妙。

Mr.P 是印度人，大我小小三字頭，但實力強橫，無論是技術知識，人際手腕，決策分析，都是一流人物。 Director L 的 staff 中，絕大部分是四、五十歲，但 Mr.P 仍 Director L 最重用的一個。 Mr.P 對自己 career 也十分有計劃，不斷培養自己的班子，小弟算是被他鞭策的頭馬之一，能入 Director L 的 staff 也是由他推荐。同時 Mr.P 也嘗試擴展自己的影響力，跟其他 Directors 甚至 Director L 的老細攪一些 projects。

可能 Mr.P 進取過頭，又唔知因什麼事刺激到 Director L，三個月前 Director L 突然一聲令下，便拆散 Mr.P 的組和下放他所有權力。當時我同 Mr.P 傾過，問他之後的打算，他話想在公司內找其他職位來做。我當時說，以你的實力應該有冇問題吧。想不到種種人事原因， Mr.P 始終被投閒置散，最後還是要離開。

Director L 平時陰聲細氣斯斯文文，但聽說被他捧上高位又再玩死的經理， Mr.P 已不是第一個。陪君如陪虎，可見一班。

必須面對的敵意

森記 — Fri, 21 Aug 2009 07:24:00 +0000

去了新組後, 得到新老細「穆哈默」的支持與嘉獎, 當然是好事, 但也要面對一些不能控制的人事問題。

老細要放假三星期, 要人代佢收 status report 同帶一次 staff meeting; 他選了我。因我有去 director (即係我老細嘅老細) 的 staff meeting, 客觀來說, 我是較方便與經理層溝通, 所以是合理人選。但有一個問題, 穆哈默組內有跟了他多年的得力工程師, 現在無端端要個新來的 run 個組, 你話佢地會點諗?

其實, 老細放假前, 他有私底下問我想唔想接呢個任務。呢d情況, 是不可縮的, 所以答案只得一個, 是 yes。當然我答得好小心, 不是懶叻咁, 而是抱著為老細辨事的審慎態度。同時我也反映會否有其他組員唔高興的問題, 之後傾咗一輪都係去馬。

今日剛開完了 staff meeting, 成組十多人, 咁 run meeting 我有經驗, 已懂壓場和控制流程的技巧。大部分組員十分合作, 報吓訊講吓笑, 正是開會最正確的態度。不過, 有位較高級的組員便擺明俾面色我看, 遲到早退全程黑面。講真我都冇計, 只好不被他影響, 顧掂自己和其他組員, 將來有機會再釋出善意吧。