森記茶餐廳

今日阿女返學, 好開心咁穿起她的「小蝴蝶」妝扮。 去到學校, 班小朋友個個都著到有型有款, 但見其中一個打扮成海盜的, 則俾一班小朋友圍攻, 算佢唔好彩。 我自己呢就冇打扮啦, 一向對扮嘢興趣不大; 不過講開又講, 自己對上一次打扮是數年前, 在一個蚊型話劇, 我是要扮女人的, 真係世事難料呀。

又記得來到美國的第一年, 那時住在一個美國人的寄宿家庭。 一天, 有人按鈴, 我去開門, 竟見到一班打扮恐怖的小朋友, 向我說了一段聽唔明的英文。 那時我大鄉里英文又差, 完全唔知發生什麼事, 以為見鬼立即關門。  之後回去說給 host mom 知, 她笑說那是 Holloween trick or treat, 把門口的糖分給他們便是了。  Oh … 小朋友們, 真的不好意思啊。

今天是跟太太十週年紀念, 以此 blog 作個紀念。

十年前, 那時跟 Felix 同一間公司, 我對他說, weekend 會飛去 Seattle 註冊結婚, 他好像有點錯愕, 那時跟他未算熟絡, 不過咁大件喜事, 點都要捉個人來講吓啦。  那年是 1999, 本來想 9月9日 註冊的, 唔記得點解, 最後冇揀到那天, 卻楝了十全十美的好日子。  雖然我地冇擺酒冇 party, 不過註冊儀式一樣記憶尤新, 那個法官好搞笑。

十年變化很多, 多了孩子, 房子, 學位, 白頭髮, 脂肪 … … 工作上仍是今日唔知聽日事, 這是唯一冇變的。

姪仔上星期終於過了來這邊讀書, 讀 DVC, 看來環境不錯。 不過聽說現在 UCB 競爭好大, 就算姪仔讀書咁叻, 要考入也不是易事。
 
記得當年來美國前的暑假, 常留在家裡想多點時間陪家人, 那時姪兒剛出生不久得幾個月, 阿媽湊, 我便經常也幫手湊這個 BB。 雖然之後因我身在異地, 不常見他, 但眾多姪兒女中, 我對他最有感情。 轉眼十八年, 現在姪人長大出國留學, 就跟我當年一樣。 這幾天他經常 MSN 問我選科, 住宿, 日常生活問題, 我便好像見番當年的自己。 不過我那時冇人可問, 多是自己跌跌撞撞尋找答案。 另外, MSN 過程中我也從姪兒學到 D 嘢, 例如, 886, 55, 我現在知道其意思啦終於。

從澳門回來已一個多月, 現在先寫「遊記」, 是想把那些值得寫的、不易輕易忘記的事情才記下。
 
上次回澳是2006年, 那時女兒未夠兩歲, 之後生了細仔, 又轉公司, 一拖便三年未回過家。 四月中, 細佬說父親近年來身體不好, 是時侯探探老人家, 所以立即買機票, 快快手決定跟女兒兩人回澳探親。
 
我同女兒, 一個大男人帶住個小女孩, 去機場過關上機, 好奇怪地, 我們好像受到特別照顧, 不少人對我兩特別禮讓。 之後在飛機上就沒什麼特別, 去到香港, 乘 A11 去市區, 女兒第一次坐雙層巴士, 十分興奮。 到了灣仔, 按原定計劃在酒店先住一晚, 第二天去了海洋公園玩, 女兒坐纜車一D都唔驚仲話要跳, 嚇鬼死我。

當天晚上過大海到澳門, 今次行程其實有求特別, 只有我細佬知我回來, 打算給老人家一個驚喜。 晚上, 我返舊屋住, 就只得我同阿女住晒。 第二朝凌晨, 細佬帶我同阿女上松山, 看見一班老人家在耍太極, 阿媽是其中一個。  細佬對阿媽說: 「帶了個朋友來見妳。」  阿媽見一條友 T-Shirt 短褲, 帶住個小女孩, 望咗好耐都認唔到是誰。 後來我叫了幾聲阿媽, 她才如夢初醒, 開心得大笑起來。

跟著我們再上鏡湖醫院, 爸爸因老人病住了院數天。 我們三大一小上到病房, 便先被護士炳我地, 話H1N1正盛點解帶小朋友上來。 不過若她們知道這小孩是由美國回來的, 可能驚那個小孩還多D。 入房見到爸爸, 他躺在床上, 身子有點虛弱但精神還可以。 女兒很慬事, 沒有害怕, 願意坐在爺爺旁邊給他抱抱。 血濃於水的親情, 一瞬間把一老一少連通起來。

今次回澳, 阿女常跟住她的堂姐妹, 玩各種活動, 其中一樣她最有興趣的, 是溜冰。 澳門的溜冰場, 好似得一間, 仲好細下, 當晚去到得幾個人。 開頭阿女跟住堂組們, 扶住手慢慢行, 真係行的就唔係溜。 後來有個教練到場, 佢又有時間, 於是請他私人教咗阿女一個鍾, $70 澳幣超抵玩,完到場時阿女已溜得 OK。

回到加州, 阿女嚷著話想再玩溜冰, 記憶所及要去到 San Mateo 先有場, 太遠了點。 幸好太太用心搜查, 原來屋企附近就有個場, 好像是 Hockey Team Shark 的練習場, 好大, 約是澳門個場的四倍。 他們設有兒童訓練班, 阿女今天去了第一堂, 見佢玩得開心又過癮, 搞到我都想學埋一份。 

去年年初, 開始打算搬屋, 因為女兒將到升讀幼稚園的年齡, 我和太太想搬去一個較好的學區, 有利女兒學習發展。 其實我們是很喜歡原本的住家, 周邊環境好, 又近公司, 住了五年好好地地。 不過, 女兒學業要緊, 加上那時屋價下滑了一點, 正好換間大點的屋, 給囝囡兩多點走動空間。 舊年年尾終於搬進新屋, 但立即遇上百年經濟大災難, 樓價也大跌。 太太看看周環的屋價, 短短三個月, 便下跌了十多巴仙, 相約半年人工, 令她甚為肉痛。 於是, 兩公婆難免會「討論」吓, 換屋的決定究竟是否值得。

森記: 「唔緊要啦, 樓價會升番上來的。」

太太: 「慢慢等啦~~~」

森記: 「間屋大咗, 子女多些走動空間, 間屋換得值得的。」

太太: 「以前屋企出面環境較好, 也可在外走動。」

森記: 「現在附近多很多餐館, 食嘢方便多了。」

太太: 「咁又係, 不過間屋蝕的價錢, 足夠你餐餐叫外賣大魚大肉。」

森記: 「又或者咁睇。 宜家做咗 Alvin 街坊, 友情是無價的啊。」

太太: 「… …」   (我都覺得頭先那句好 hard sell)

森記: 「點都好啦, 我們搬屋最主要目的為咗學區, 就看看個女能否順利申請入學。」

太太: 「呢個係嘅。」

上星期, 學校報名時間, 只此一天。 這學校是好搶手的, 以前家長要凌晨排列報名, 因為是先到先得。 今年轉了用抽籤, 我和太太還是一早去了學校, 但係多人到呢, 等足四粒鐘。  到我地時, 只用了三分鐘核對申請文件便完事了。  兩天後, 學校公佈抽籤結果, 150人報名, 119入到, 小女是其中一個。 Yeah~~  鬆了一口氣, 現在換屋的決定 justify 了。 那些樓價是升是跌,  這幾年也不用花神考慮, 因為女兒的學業是無價的 … kind of。

Weekend 元宵節, 太太推介去 Oakland China Town 睇 show, 話有華人文藝表演。 本來我興趣不大, 還要帶住兩個細嘅, 不過太太鍾意就去啦。 想不到文藝表演除了唱歌跳舞, 還有少林功夫表演, 對於我呢個功夫漫畫迷, 實在喜出望外。

雖然冇鐵頭功同金剛腿, 但表演者異常落力, 所以絕對值回票價 (因為係免費的)。 開頭兩個少林僧打拳和耍掍, 己經睇到全埸拍爛手掌, 後來有個十歲小女孩打咗一套拳, 我個女更加睇得開心。 但之後大會來個反高潮, 叫班長者來耍氣功, 慢到呢,  加埋D催眠音樂, 仲搞咗超耐。 後尾音樂一停, 大家便鼓掌摧他們走。 點知原來音樂部搞錯咗, 未耍完架, 希望長者們唔好被激到用錯運氣, 唔係就罪過罪過啦。 氣功完了, 壓軸少林鞭, 超勁呀, 耍到「發發」聲, 掂吓都死呀, 我唸在前排D觀眾都幾驚青吓。

表演完畢, 阿女好鍾意, 開心到同我 high five。 不得不讚句: 「少林功夫醒, 少林功夫好勁 ~~~ 真係勁。」 

趁太太訓著, 同個乖女搞咗呢 set 小禮物, 氹到媽媽好開心, 老豆都係。 不過太太睇見將咭的第一句是: 邊個係 Tomy?   啤~~。  那隻狗是個女近期最愛, 有名堂的, 叫「pizza」。 因為佢唔鍾意 hot dog 喎。

年初一, 打了個電話拜年, 　一口氣講咗 12 次「恭喜發財」。其實呢個是我每次農曆新年的例行動作, 原因是, 我打番去在澳門的父母拜年。而我會就番時間, 在中午食飯時打, 因為這時他們一定和我兄弟們一起食, 咁我就一次個同佢地拜晒年啦。

我父母的子女中, 只有我一個身在海外, 其他全在本地撈得唔錯。 我的兄弟也個個成家立室, 所以當我打電話回家拜年, 個次序是: 阿爸, 恭喜發財, 身體健康, balabala ….  阿媽, 恭喜發財, 身體健康, balabala … 大佬, 恭喜發財, 生意興隆 … 大嫂, 恭喜發財, 青春常駐 … 然後到其他兄弟阿嫂。 再之後到D侄仔姪女, 恭喜發財, 學業進步 ….  講足十二輪 。 最搞笑的是, 我唔係好記得侄仔女D名同佢地把聲, 所以次次都要問佢地係邊個。

另一樣幾得意嘅, 就係佢地大都會問我同一個問題: 「你那邊有沒有新年氣氛呀?」 而我嘅答案是: 真係沒什麼氣氛。 同朋友食餐飯, 睇吓轉播的大陸賀年節目, 就係咁多啦。掛電話後, 如往常一樣, 會有點失落感 …不過呢種失落感, 在離開父母親人後咁多年中, 己經歷過N咁多次, 所以都慣了。

在此, 唔差在同扑友們講多次「恭喜發財」。 另外, 如果你有幸和父母兄弟姊妹同住的話, 珍惜這個緣份和時光啊。Don’t take it for granted.

呢個扑, 是用來紀念一張用了十多年的書桌。

90年代初, 剛來美國不久, 便和四位中學同學出來租了個apartment。 當時我和另一同學 share 一間房, 合買了一張99元的木書桌。 當時我兩是一人坐一邊, 晚晚一起讀書, 苦學生模樣。 後來同學搬走, 我便獨霸那張書桌, 我的 college 和大學生涯, 便是和它一起渡過。 學生時代,為慳錢年年都搬屋, 呢張書桌又重又大份, 所以次次都搬到我死死吓。

後來 relocate 到加州, 公司搵專人幫我搬屋, 咁我又叫佢地搬埋張書桌。 那時後, 我已不再要用它來讀書, 但我把証件之類放在它的抽屜中, 所以這書桌是很重要的。 之後又搬過幾次屋, 那時有點錢就請人搬了。 但記得有一次, 搬屋個哥哥仔笑說, 搬張咁舊嘅書桌, 搬運費還貴過它; 佢講嘅有道理但係我就冇理啦。

其實經過咁多年, 張書桌已經又殘又舊, 早陣子, 突然成個抽屜跌咗下來, 皆因 wore out, 木材已經破爛, $99 貨式捱到十多年算係咁。 不過, 上兩星期又搬屋, 今次決定唔要張書桌啦。 為了方便拋掉, 我把木板續塊拆除, 回想到當初把它 assemble 時, 老土講句, 十多年瞬間過去, 光陰似箭呀。

轉眼間個女已經四歲。 這幾年, 時間過得特別快, 因多了小孩要照顧, 每天忙忙碌碌, 春去秋來瞬間就過去。 有趣地, 時間也好像過得特別慢, 因隨著小孩成長, 深刻的回憶特別多, 而且時間次序清晰。 所以, 過去幾年佔存腦袋的時空, 比單身就業時多很多。 話說回來, 這一年對女兒是特別的,  因為她多了一個弟弟。 女兒天性什有愛心, 喜歡嬰孩, 常想幫手照顧細佬, 只是我們唔係好俾, 怕她越幫越忙。 不過有一次, 細仔凌晨三點大哭, 肚餓要吃, 我們弄完奶回房, 卻發覺個女竟靜靜雞幫細佬換咗尿片, 都包得唔錯 … 真係估佢唔到。

今日完成了公民慶典, 終於做咗花旗人, 心情沒多大特別, 只是看奧運時有點感慨, 現在我應該支持中國隊或美國隊呢?   慶典時, 有個環節什有趣, 官員順 A 至 Z 讀國家名稱, 然後來自那國的人要起立。 叫中國時, 看到有數十人起身, 我是其中一位。 而叫印度人時, 嘩, 至少兩三百人, 難怪矽谷被他們雄霸了。

下午回到公司, 媽媽打電話來, 話報喜, 我問什麼意思!? 她說收到澳門政府給我的生果金, 成五千大元。 真係咁橋做了花旗人才收到這筆錢, 有點受之有愧啊, 不過就梗係有愧都照受啦!

姪仔快將升讀大學, 久不久會問吓我關於讀書的意見, 上禮拜佢同我話決定讀物理, 問吓我點睇。 我就首先介紹咗剛考入 UCLA 物理系的 Janet 姊妹俾姪仔識, 在此先多謝她給與的保貴意見。 自己中學時都十分喜歡物理, 雖然讀書唔係好叻, 但是物理科算是強項。 讀大學是興趣依然, 甚至課餘找書研究「大爆炸理論」和「相對論」, 雖然結果仍是一知半解。 咁自己最後選咗讀工程, 係想搵份工容易些。 不過呢, 我就幾支持姪仔的選擇。  原因係 outsource 已成主流, 在美國, 工程學位不見得特別吃香。 倒不如讀些尖端些、困難些的科目, 那在 global competition 上可能還更有優勢。

多謝妳。

Somehow I need to attend many meetings at work in recent months.  Even my wife has a tough time to reach me.  She asks for my meeting schedule, so she know when to call me.   Here it is.

住家附近是 Theme Park Great America , 只約三分鐘車程,。 今年為了給女兒多個好去處, 買了 Season Pass, 每隔星期都和她去一次, 她最喜歡玩是一個兩層的 Merry-Go-Around, 聽說是全球最高的。 另外她愛玩一些小朋友機動遊戲, 差不多每次也是玩那幾個。 我就總是帶她走來走去, 沒有玩什麼, 當散步吧。

太太其實常叫我去玩些機動遊戲, 不要浪費門票, 只是我興趣不大。 原因是以前舊公司每年都會招待員工去 Great America 玩半天, 那時我跟 Felix 就已經玩過大部份最刺激的 rides, 所以現在對它們沒有什麼感覺, 除了一個, 就是跳樓機 Drop Zone。 這個我真係有d 驚, 一來它很高, 二來它出過事死過人, 所以我次次經過這個 ride 都是又想玩又驚死。 不過, 上星期天是 Season 最後一天, 所以把心一橫決定玩一次。 太太知我怕呢個 ride, 所以問我點解要玩!? 咁呢個答案好簡單, 正是「因為驚先至玩」, 而究竟驚嚇程度如何, 睇吓我個樣就知啦。

話說一天吃完晚飯, 想回到公司完成一點小工作, 太太和囡囡沒事做, 於是跟我一起出去。 到了辦公室, 見到有電話留言, 便用 speaker phone 播放, 然後聽到一把好嬌嗲的聲音: "Hi 森記, how are you doing …"  原來是 XGF！ XGF來電本屬平常, 年中都會有幾次, 一般都是談談近況, 客客氣氣。 但這次太太就在身旁, 一字一句現場收音, 出來的效果就異常驚嚇。

由於森記光明正太, 無須暫停播放留言或做任何小動作。 但當時背向太太, 所以不知她的表情如何, 只感覺到有兩道寒光, 如利箭穿心。 好不容易聽完留言, 保持鎮定, 轉身對太太說:

森記: 係呀邊個囉, 都係嗰幾句啦。
太太: 佢把聲好甜噃, 迷死男人啦。
森記: 唔覺呀, 都唔關我事啦。
太太: 佢呢排點呀?
森記: 唔清楚呢 … 係呀, 買咗啲嘢送畀你。( 打開 drawer, 拿出一樽燕窩。)  是余仁生, 貴嘢來的,  買給你保身養顏。
太太: 對我咁好!?  有冇送過畀其它人呀?
森記: 咁梗係冇啦。

太太對這樽燕窩甚為受落, 至於那個驚嚇來電, 太太夠修養, 沒有再提。

姪兒在六月尾來了灣區讀暑期英文班, 就讀的是 Brandon College。 它是我從數間學校中, 親自探訪後而精心揀選的。 價格不是最平, 規模亦不是最大。 勝在師資良好, 服務誠懇, 歷史尤久, 地點方便, 應該會很適合姪兒。

連 續兩個週末, 帶他們 (姪兒, 其同行的朋友, 小女兒) 去玩, 累得要命。 這三位小朋友年齡的總和, 剛好跟我的歲數相同。 試問一位老人家又怎能比得上他們的 energy 呢!? 我盡量選一些地點, 是他們可以覺得新奇、玩得開心, 又不用我太多走動。 己經去過的地方有: San Jose Tech Museum, 金門橋, 唐人街, 漁人碼頭, Santa Cruz Boardwalk, Hometown Buffet, 和 Sweet Tomato。

Boardwalk 行得我最辛苦, 又熱又多人, 個女又走過不停。 不過加州的陽光與海灘, 沒理由不帶他們去看看的。 最輕鬆的是 Hometown Buffet。 係! 呢個係景點來的, 在澳門他門未見過這種又平又正的自助餐。 他門最喜歡便是自制香蕉船和溝汽水, 而我就坐著慢慢食我的牛仔骨。 各位有其它好介紹嗎?

由於種種原因, 太太只能一個人回去馬來西亞參加婚禮。 自己照顧小女兒一個多星期, 最困難的是分身乏術。 家務要等她睡了才可慢慢做, 去買東西必須帶她一起, 打電話時她會在旁擾嚷, 就算我上厠所, 她也要站在門外監視, 好像是怕我會消失似的,  弄得我沒有半點私人空間。 開始數天特別覺得辛苦, 後來慢慢習慣了, 也學會一些新招數去和女兒溝通。 這段時間裡, 作為父親, 應該算是成長了一點。

另一方面, 女兒知道母親不在身邊, 自己竟變得獨立起來。 平時的穿褲子、穿鞋、吃飯、上落車等, 都會盡量自己搞定, 家頭細務也會主動幫幫手。 有一兩次她不小心弄倒一地東西, 竟會自覺地去把它們收拾好。 每晚睡前, 她都要我講故事, 但有一晚我倦得要死, 我跟她說爸爸很累, 無力講故事。 濛矓中我感覺到女兒有點失望, 但沒有吵鬧, 只靜靜地看著我慢慢沉睡。 還有一件事蠻特別, 一晚我兩在看電視, 正播放 Monster Inc., 看到近結尾一段, 女兒突然眼泛淚光, 沙啞地對我說: 「Baby 無 Daddy 好可憐。」  第一次見到女兒會被感動, 我想她真的長大了。 幸好結尾最後一刻, 劇中小孩的聲音重現, 我便說: 「Baby 又見到 Daddy 了。」  女兒終於破涕為笑。

***

貪得意買了部新手機, Samsung Stripe t-329, 有影相功能, 勁呀!!  (ok, 我係落後啲)  影了第一張手機相, 係我嘅 office。