森記茶餐廳

早前睇明報社評, 話香港警察投訴冇人工加, 影響士氣; 他們卻不知大部份市民, 不單只冇人工加, 隨時連份工都會冇埋。 呢個情況, 我呢邊一樣, 過去幾年基本上是冇人工加的, 無論公司賺錢與否。想加人工!? 一係升職, 一係跳槽, 情況真係有點灰。
  
有說, 看看身邊比自己更不幸的人, 便會慶幸自己的景況。咁我喜歡以另一角度去看 — 從前和現在的自己。
  
記得第一份工, 暑期工來的, 在製衣廠做打雜, 由朝忙到晚, 又擔又抬, 苦力一名, 每一小時賺的錢, 夠我食一碟芽菜炒麵。後來讀U, 在圖書館擺書, 又係暑期工由朝做到晚, 但只係放吓書, 可慢慢來唔使急。 呢次每一小時賺的錢, 夠我食一份麥記套餐, 有汽水啊。到剛出來做正職, Fresh Grad 好勤力架我, 每日唔過7點唔會走。做電腦的, 有得坐, 舒服多了, 人工也大大增加, 足夠租屋自立生活。再到現在, 都係做電腦, 但少了做事多了開會吹水, 每日6點幾就走因要接仔女, 而人工比以前更多, 可供樓和供養家庭了。
  
就咁睇, 付出越少收入越多, 還有什麼好怨, 直頭要大笑三聲呀, 哈哈哈!

回澳其間, 晚上沒電腦用, 所以追看一本書「明朝那些事兒」作消遣, 這書用輕鬆手法寫明代的大歷史。作者給明代近三百年中, 選出一位頭唬人物, 是為「王守仁」。此人年幼時己顯天份, 親友以為他將來必做大官。但他追求的不只於此, 而是人生大道理, 可惜三十多歲還是一無所得, 一事無成。直至一天, 他悟「道」成功, 史稱「龍場悟道」。自此他縱橫天下, 屢建奇功, 成立一代軍事家, 思想家。王守仁號「陽明」, 其思想成為一門哲學, 是為「陽明學」, 主旨為「知行合一」, 其在日本有深遠影響。
 
話題轉去一位我十分喜愛的網球手: 費特拿。 年幼時他已顯天份, 但不像其他天才球手, 在他在 21 歲前還只是無名小將 (張德培, 阿加斯等 teenagers 時已拿過大滿冠)。不過, 費特拿在 22 歲, 2003年時, 悟「道」成功, 創出一套獨特打法,。自此縱橫網球界, 幾近無敵。星期日, 我六點起身, 睇佢打法網決賽。他第四年打入決賽, 這次終於勝出, 平了史上最多的 14 個大滿冠的紀錄, 也成了少數的獲得四個不同大滿冠的球手, 現被公認為 Open Era 最偉大的網球手。

相關網誌: 2006, 2007, 2008 French Open

今次回澳, 事隔三年, 如米迦在她的 blog 曾提及, 澳門真的變了很多。 多間國際級一流大酒店賭場, 人人有工開, 賺大錢。 香港人過大海唔再係來博殺而係來返工, 依莎貝拉又為首富誕下男孫。 馬交 friends, 終於可以威番吓。 不過奇怪地, 同不少人傾談後, 他們給我的印象, 對澳門的前景不是絕對樂觀。 澳門的經濟繁榮, 是政治產物, 早前中央新法, 國內人仕只能三個月來澳一次, 遊澳旅客立即下降一成。 澳門的大酒店一間接一間, 究竟是市場實質需要, 還是另一個市場泡沫, 只可等時間証明。 不過澳門人現在的收入和生活質素上昇了, 這是事實也是好事。 但這也令我回想起十年前矽谷的科技泡沫, 居安思危, 不可不考慮啊。
 
另說三件鎖事。 1. 何猶龍打骰的新濠天地六月開業, 有幸看了旗艦 show 「龍騰」, 360度立體科幻旅程, 人人都睇到嘩嘩聲, 我覺得真的不錯, 絕對值回票價 (因為係唔使錢的, 暫時)。 2. 一日在金沙賭場附近遊蕩, 有位十分斯正的國內人仕好有禮貌地問我借錢。 呢種情況, 澳門人是好有經驗應對的, 無論是什麼理由, 買船票或買飯, 一律 say no!   3. 一天又在遊蕩, 一位什靚的韓國女仔拿住本旅遊指南, 問了我幾個景點如何去到, 我竟然一個都答唔到佢, 即刻唔敢認係澳門人, 話俾佢知小弟都係旅客, 無能為力啦。

一月尾完成了個新產品, 個組仲攞埋獎, 好開心。本來諗住可以抖一抖, 想不到二月尾, 便要接手了一個更高難度的 project。呢個項目, 年半前, 部門另一組 (A組)曾嘗試做過, 他們五個人三個博士, 兩個 Stanford, 可謂是部門精英。他們趕了四個月, 連聖誕假都冇放, 後來勉強交差。他們都告訴人, 做得超級辛苦, 而且得出來的 solution 不完美, 最後寫了報告就不了了之。 現在部門要我接手這項目, 利用我組新產品的某個特質, 應可將這項目搞好。上頭命令, 一定要接, 但看了交貨時間表, 心都寒埋。 得兩個兩月, 五月一日必定要交貨。
 
上次佢地精英盡出都搞到一鑊泡, 今次我們還只得一半時間。我當時諗, 技術上, 這冇可能可以做得到。咁唯有玩政治啦, 我先向A組組員搜集資料,  了解上次佢地遇到的困難, 之後向經理們什至 Director Mr.L 遊說, 要求廷長時間。他們都說, 明白這 project 的難度, 但給了個這個那個理由, 總之5月1日, 死線!
 
唯有頂硬上啦, 當時我所抱的心態時, show the effort, 到時交唔到貨起碼唔使太樣衰。之後同組員 plan the work, 再安慰佢地唔使太緊張,  盡力而為就得啦。出我所料, 他們好有信心, 覺得有上次經驗, 必定可準時交貨, 我卻未如他們樂觀。之後搞咗一個月, 進度真的不錯噃。但當剩番三個禮拜時, 收到一個標題為「Big Problem」的電郵。組員發現了一個根本性的問題, 之前做的完全是錯。這雖然很失望但未至於驚訝, 我有第二手準備: Daily War Room。每日全組開會一次, 將各人的進度, 難題, 絕招, 全部攤出來講。目的是, 不要浪費任何溝通時間。 其實當去到呢個地步, 我已打定輸數, 但為了士氣, 我反而要扮到好樂觀, 每日也說 great progress, 說我們一定可以做到的。

置之死地而後生, 全力以赴的結果, 問題一個接一個被解決, 意想不到的好方法, 各人無私獻計, 大大加快進度。上星期五, 5月1日, 奇蹟真的可以發生。 544個 cases 完成了 542 個, 已可向上頭交侍, 算是準時交貸了。呼, 鬆一口氣。

細仔一歲多了, 開始懂得同家姐爭嘢玩, 家中小孩嘈吵的時間, 不斷增加。不少時候, 我買新玩具給大女兒, 起初她都是開開心心, 還喜歡「曬」俾細佬睇。細佬見家組有好嘢玩, 又要爭吓, 之後個女就又吵又喊唔肯俾, 麻煩著我呢個老豆。依照一般西人教仔方式, 我會教佢地要「 share 」。 又依照中國傳統家庭觀念, 會同個女講要「大讓細」, 同個仔就講「孔融讓梨」。 最後, 加多句懶有創意的道理: 「呀女, 未買呢個玩具之前, 妳仲好開心的。現在有了玩具, 反而喊晒口。妳要記得, 妳本來什麼也沒有, 爸爸買玩具回來, 是想令妳開心的。」
 
最後那句, 女兒聽懂多少無從考究, 反而令自己有點思考。我們都不是小孩了, 生活中要的不再只是十多元的玩具, 但我們在追求和捨棄的任性情度, 其實又被小孩子進步幾多?   有人努力工作, 追求成功感覺和物質享受; 有人全心付出, 追求真誠愛情和別人關懷; 有人不擇手段, 追求心中慾望和無盡金錢。追求的過程人人不同, 但當得到手後, 喜悅是必然的。可惜喜悅多是短暫, 得到後的東西總變成理所當然, 我們開始擔心失去已經擁有的; 只要失去那麼一點點, 便換來不悅與憂愁。 我們是否應該記住, 我們本來什麼也沒有, 追求了這樣那樣東西, 其實是想令自己開心啊。

過去一年經濟不好, 我地做工程師的更被受 outsource 壓力, 前景極不明朗。 有見及始, 太太用了不是時間研究轉行的可行性, 搜查資格和薪酬。 她的首任考慮是做護士, 因她認為人工高又唔會被 outsource。  不過, 我卻不認同她的諗法。一來, 早幾年佢大住肚, 辛辛苦苦完成咗個 MSEE, 現在轉行真的太浪費了。 二來, 做護士是否真的拍得住工程師的人工呢?  我怕她讀完 nurse 之後會失望。 不過她沒理會我的意見, 繼續搜查其他不能被 outsource 的工作。 上禮拜她告知我一個驚嚇資料, 說本地政府請清潔工人 (Janitor), 人工是 ….  還登在 web site 上。 哇, 不是吧, 跟我一個在某大 networking 公司工作的軟件工程師朋友, 薪酬相若。 怎麼可能?  咁讀書把鬼?  我去掃街起碼唔使晚上在家工作, 也不用開會時俾人插。
 
不過呢, 我始終唔係好信, google 一下 Janitor 的本地人工, 發現了以下一個什有用的網址, 例了大部份行業的平均薪酬。 睇清楚, 掃街未如那特殊例子咁好搵啦。而其他行業的數據, 好似都幾準確吓。

老細放假三星期, 代他打理整個組期間, 我要每週和 Director Mr.L 見面, 報告組內情況和各項 projects 的進度。 因此, 我成日要走去同十多位組員傾計攞料。而除了工作事項外, 也問問他們對於組的個人意見。 到了最後一次向 Mr.L 匯報時, 我綜合了各組員的意見, 想和他分享和討論, 看有什麼是我可幫助全組。 當然我說得十分得體, 表達意見之餘又不會有攬權之嫌, 說得客觀又給與意見。 Mr.L 細心聆聽和跟我對答, 其中兩點, 值得一提。

1. 聽完我對組員的綜合報告, Mr.K 沉思了一會, 然後慢慢地問了我這個問題: 「Do you think they know what they are doing?」 哇, 呢個什麼問題來的!?  咁樣問法, 佢當然唔係想我答 Yes.  但係答 No 一樣唔好。 俾你會點答呢?  我就咁答: 「Let’s put it this way, all of our engineers are doing the work to add value to the team and the company.」 當然呢個答案未完全合佢意, 但足以打開話題繼續傾落去。

2. Mr.K 說出, 原來他覺得我地 team 的組員做事有這樣那樣的問題, 還以一兩個工程師做例子。 聽他這樣說, 我心諗 – Mr.K 手下有三個經理, 我老細是其中之一, 總共近60多個工程師 under 佢, 他怎會有時間和機會了解到每個員工呢?   他說, 他這層次或更高層次的經理們, 每個月接觸基層員工的時間不超過三分鐘。 但是, 就是這三分鐘決定他們對某員工, 或全組的綜合印象。 所以呢, 森記個人意見, 當有機會和高層接觸時, 要好好把握住那幾分鐘, 因那個印象, 是被動, 是積極, 是自主, 是混日子, 是會留在他們腦海裡一段長時間的。

去年年初, 開始打算搬屋, 因為女兒將到升讀幼稚園的年齡, 我和太太想搬去一個較好的學區, 有利女兒學習發展。 其實我們是很喜歡原本的住家, 周邊環境好, 又近公司, 住了五年好好地地。 不過, 女兒學業要緊, 加上那時屋價下滑了一點, 正好換間大點的屋, 給囝囡兩多點走動空間。 舊年年尾終於搬進新屋, 但立即遇上百年經濟大災難, 樓價也大跌。 太太看看周環的屋價, 短短三個月, 便下跌了十多巴仙, 相約半年人工, 令她甚為肉痛。 於是, 兩公婆難免會「討論」吓, 換屋的決定究竟是否值得。

森記: 「唔緊要啦, 樓價會升番上來的。」

太太: 「慢慢等啦~~~」

森記: 「間屋大咗, 子女多些走動空間, 間屋換得值得的。」

太太: 「以前屋企出面環境較好, 也可在外走動。」

森記: 「現在附近多很多餐館, 食嘢方便多了。」

太太: 「咁又係, 不過間屋蝕的價錢, 足夠你餐餐叫外賣大魚大肉。」

森記: 「又或者咁睇。 宜家做咗 Alvin 街坊, 友情是無價的啊。」

太太: 「… …」   (我都覺得頭先那句好 hard sell)

森記: 「點都好啦, 我們搬屋最主要目的為咗學區, 就看看個女能否順利申請入學。」

太太: 「呢個係嘅。」

上星期, 學校報名時間, 只此一天。 這學校是好搶手的, 以前家長要凌晨排列報名, 因為是先到先得。 今年轉了用抽籤, 我和太太還是一早去了學校, 但係多人到呢, 等足四粒鐘。  到我地時, 只用了三分鐘核對申請文件便完事了。  兩天後, 學校公佈抽籤結果, 150人報名, 119入到, 小女是其中一個。 Yeah~~  鬆了一口氣, 現在換屋的決定 justify 了。 那些樓價是升是跌,  這幾年也不用花神考慮, 因為女兒的學業是無價的 … kind of。

三個星期前, 老細放大假, 走時將個 team 交俾我打理, 給與了幾項特別指示, 然後告訴 Director Mr.L, 有什麼事搵小弟, 之後就絕塵而去。 以前老細放假, 會叫我同另外兩個 senior 合力管住個 team, 今次佢一走便是三個禮拜, 而且只叫我一個去 run 個 team, 我是心感壓力的。 成組十多人, 我是最遅加入的幾個之一, 組員也有與我同級, 甚至更高級的工程師, 所以我對他們的態度是要很小心的。  那時我只希望呢三個禮拜冇事發生, 平穩渡過, 但經驗告知, 一定會有人搞事的, expect the unexpected.

老細走了第二天, 組員間已有輕微磨擦, 個 junior 唔服一個 senior, 個 senior 便在電郵公開為難他。 呢D事, 經理在時, 佢地一定唔敢做, 家吓煩著我, 我自已都還有很多工程項目要做的。 點都好, 私底下同佢地四四六六拆掂佢, 搞咗我大半日, 問題算是解決了。 之後人事間平靜了兩個星期,  點知最尾幾日才來一個大炸彈。 另外一組的總工程師 (又係F哥以前的老細), 繞過我, 直接向我組員施壓, 要搶一個工程師 resource。  呢個我有少少慶, 但唔 surprise, 我知總工程師個性格係咁。 我最慶的是, 我的 senior 組員全部聽晒佢講, 就由得佢攞走一個 junior 工程師去做佢的 project。 而那個 junior, 有口難言, 向我求助, 我明白佢做細嘅, 冇計, 我做大嘅會幫佢。 今次我花的口舌更加多, 同四五個組員遂個了解情況, 再同 Director 傾, 最後再同總工程師拆掂佢。 雖然結果非我最想要的, 始終我權力有限, 但我已經盡力去保護我的組員, 問心無愧了。

今天經理回歸, 第一件事便提到總工程師搶人的事。 他未有怪責, 但他說會親自同總工程師再傾,  希望能順利解決。

過去一年多, 平均每星期要上8個 meetings, 每個會一個鐘, 足足一個工作天。 會議性質各式各樣, 有客戶支援, 有工程計劃, 也有純吹水唔知為什麼的。 不過, 其中 Director Mr.L 的 Staff Meeting, 我卻是很喜歡去, 因為次次我都學到D嘢。 而觀察 Mr.L 的應對、言行、決策, 我也覺得是一種享受, 冇誇張。

Mr.L, 管50多人, 他的 staff meeting 則有十人。 他為人十分文靜, 講嘢陰聲細氣, 通常開會, 他說話的總時間不會超過十分鐘。 開會時, 他是叫各組經理報告, 冇問題他便點頭, 有問題他便加兩句, 大部份時間, 他是沉默的。 但他的身體言語卻告訴全組人, 每句說話他也在細心聆聽和思考, 只要稍有不對路, 他必能發覺及指出。 這種無形的壓力, 令經理們一定會做足功課才開會, 絕不敢馬虎。

有時, 有些經理的 project 進度未如理想, 他便施壓, 他會說: 「That should be done yesterday, why it is delay … …  This has to be done on-time, what do you need to get it done?」 他說這些話時都是慢慢地, 但語氣卻是肯定的。 可想而知, 這時候, 全間房十幾對眼都會「啤」住那個被問責的經理。 通常那經理都會不斷解釋, 如果 Mr.L 覺得解釋唔滿意, 他會保持緘默, 那經理便只能在畀人「啤」住的情況下繼續講落去。 咁就好易出事啦, 因為這樣講落去實有出錯的時刻, 會議中全是經理級和總工程師人馬 (除了小弟)。 呢班人全都好醒, 咁嘅情況, 便會找機會插嘴, 踩對方一兩腳。 例如阿 Felix 哥的前老細, 一見對方出錯, 9成會出聲。 一個開始其他便跟住來, 被幾個人圍嘔, 那經理是冇機會反擊的。 Mr.L 覺得那經理被人炳夠了, 就會細細聲講句: 「so, what to do next?」  這時候, 總有人提出不同意見, 有冇用就見仁見至。 那經理啱啱俾人「輪」完, 真係元氣大傷, 除了「啊」之外都唔知講什麼好了。 聽完眾多意見後, Mr.L 會揀一個較好的, 然後問那經理和提出意見的人: 「Will you have a separate meeting to follow-up?」 答案好明顯只得一個: Yes。 之後, 散會, 冇關係的人, 呼~~ 鬆一口氣。

Mr.L 這種以冇意見為意見, 以冇招式為招式, 有些像中國人所說的「將將之道」。  話說漢朝開國時期, 劉邦和他頭馬 — 天下最打得的大將軍韓信傾計。 劉邦問: 「你覺得我行軍打仗叻唔叻?」 韓信答: 「OK 啦, 十萬左右的軍隊應該可以指揮自如。」 劉邦說: 「閣下呢?」 韓信: 「越多越好。」  劉邦又問: 「你打仗咁叻, 為什麼又聽命於我。」 韓信答: 「你是將將之材, 將軍們都服從你。」

故仔就講完了, 希望冇浪費大家時間, 若能有什麼領悟就更好, 但記得醒番少少見解被小弟啊。

Weekend 元宵節, 太太推介去 Oakland China Town 睇 show, 話有華人文藝表演。 本來我興趣不大, 還要帶住兩個細嘅, 不過太太鍾意就去啦。 想不到文藝表演除了唱歌跳舞, 還有少林功夫表演, 對於我呢個功夫漫畫迷, 實在喜出望外。

雖然冇鐵頭功同金剛腿, 但表演者異常落力, 所以絕對值回票價 (因為係免費的)。 開頭兩個少林僧打拳和耍掍, 己經睇到全埸拍爛手掌, 後來有個十歲小女孩打咗一套拳, 我個女更加睇得開心。 但之後大會來個反高潮, 叫班長者來耍氣功, 慢到呢,  加埋D催眠音樂, 仲搞咗超耐。 後尾音樂一停, 大家便鼓掌摧他們走。 點知原來音樂部搞錯咗, 未耍完架, 希望長者們唔好被激到用錯運氣, 唔係就罪過罪過啦。 氣功完了, 壓軸少林鞭, 超勁呀, 耍到「發發」聲, 掂吓都死呀, 我唸在前排D觀眾都幾驚青吓。

表演完畢, 阿女好鍾意, 開心到同我 high five。 不得不讚句: 「少林功夫醒, 少林功夫好勁 ~~~ 真係勁。」 

自2007年中, 接替了一個 project 的 lead 的位置, 工作上的範疇和壓力便有了很大改變。 那個 project 的目的, 是要完成一個全新的 design software, 組員有5個: 兩個印度, 一個蘇聯, 一個台灣, 一個澳門。 5條友分別隸屬三個經理: 一個印度, 一個中東, 一個香港, 情況夠晒混亂。 而小弟的責任有三個。 1. 每週開兩次會, 由我帶, 和寫 meeting minutes, 個別經理們會坐在旁聽。  2. 策劃 project 的 phases, 和同組員傾掂數分配工作。 3. 是經理最關心的, 每一個 phase, 幾時交貸, 交什麼貨, 由小弟負責。

這年多裡, 因為這個 project, 經歷了不少東西, 唔開心的居多。 試過和另一組的 lead 開會時扯火鬧大交 (Felix, 你以前老細, 唔易搞)。 也試過畀自己老細關埋房門駡足半粒鍾。 不過衰嘢唔好講咁多, 自己都學到唔少嘢的;  由於代表全組, 經常要和上級溝通, 而咬文嚼字便成了小弟強項。 例如, 1. have problem -> have room to improve.   2. can’t meet deadline -> we are commit to deliver by this date (actually a week later, but don’t say it).  3. can’t implement a feature -> hold up the feature due to strategy reason.  呢D嘢真係假到爆, 不過唔咁寫又不利全組。 點都好, 呢個 project 近幾個月到達高潮, 因為二月一日是最後一個 phase 的 deadline, 全組人都在趕貸。

Deadline 前兩日, check 埋最後一個 bug, 完成埋最後一個 data report, 我覺得應該掂啦。 深呼吸一口氣, 寄出一封 Email 畀經理們和組員, 大意為: 「 The project is completed.  I declare the tool is ready!  Congratulation to the team!! 」   跟住連埋一些 data, 吹吓個 tool 點樣架勢之類。 咁其實我呢段話說得好死, 只要其中一個經理覺得唔妥, 公開 challenge 我一句, 我便有排煩。

好啦, 我坐在電腦面前等回應。 總於收到第一個經理的回覆, 之後是第二個, 第三個, 都是祝賀和讚美的說話。 一時間, 有點衝昏頭腦的感覺, 這一年多的心血沒有白費啊!  今天, director 將這 project 完成的消息向全 department 報告。 這 project 算是成功了, 暫時告一段落, 若有其他問題, 便遲些再煩吧。 

Austrilia Open 2009 final, yet another Federer vs. Nadal match up.  This year I didn’t subscribed ESPN, so can only go to online radio to listen the game live.  Still I stay up till 5am Sunday to listen the whole match, and thus couldn’t get up to attend Worship … … Anyway, back to the tennis game.  Federer seems back to his top form in additional of a three-days rest.  On the other hand, Nadal just finish a marathon 5.5hr semi.  So Federer was seen as the favorite to win this Champion and go ahead to tie Sampras’ all time 14 Grand Slams record.  The outcome, another five-sets nail biting epic.  Nadal’s strong will and unbelievable endurance edged out Federer’s supreme tennis skill, winning the Aussie Open Title. 

During the last 12 months, Nadal has beaten Federer in all three surfaces in Grand Slam final.  Federer, with such confidence and pride deep inside him, can’t hide the frustration and disappointment.  Broke down and cried during the trophy ceremony.  It was sad, but that’s life and there is no exception to anyone, even he is considered as one of the greatest of the game.

趁太太訓著, 同個乖女搞咗呢 set 小禮物, 氹到媽媽好開心, 老豆都係。 不過太太睇見將咭的第一句是: 邊個係 Tomy?   啤~~。  那隻狗是個女近期最愛, 有名堂的, 叫「pizza」。 因為佢唔鍾意 hot dog 喎。

年初一, 打了個電話拜年, 　一口氣講咗 12 次「恭喜發財」。其實呢個是我每次農曆新年的例行動作, 原因是, 我打番去在澳門的父母拜年。而我會就番時間, 在中午食飯時打, 因為這時他們一定和我兄弟們一起食, 咁我就一次個同佢地拜晒年啦。

我父母的子女中, 只有我一個身在海外, 其他全在本地撈得唔錯。 我的兄弟也個個成家立室, 所以當我打電話回家拜年, 個次序是: 阿爸, 恭喜發財, 身體健康, balabala ….  阿媽, 恭喜發財, 身體健康, balabala … 大佬, 恭喜發財, 生意興隆 … 大嫂, 恭喜發財, 青春常駐 … 然後到其他兄弟阿嫂。 再之後到D侄仔姪女, 恭喜發財, 學業進步 ….  講足十二輪 。 最搞笑的是, 我唔係好記得侄仔女D名同佢地把聲, 所以次次都要問佢地係邊個。

另一樣幾得意嘅, 就係佢地大都會問我同一個問題: 「你那邊有沒有新年氣氛呀?」 而我嘅答案是: 真係沒什麼氣氛。 同朋友食餐飯, 睇吓轉播的大陸賀年節目, 就係咁多啦。掛電話後, 如往常一樣, 會有點失落感 …不過呢種失落感, 在離開父母親人後咁多年中, 己經歷過N咁多次, 所以都慣了。

在此, 唔差在同扑友們講多次「恭喜發財」。 另外, 如果你有幸和父母兄弟姊妹同住的話, 珍惜這個緣份和時光啊。Don’t take it for granted.

一切要從 re-org 說起。

當年在舊公司, 最高層心念一轉, 對一個大 project 的媛慢進度追究責任, 向部門動刀, 換了新 VP 「保羅」頂上。 新人事誓將帶來新作風, 山雨欲來, 不同部門的經理各懷鬼胎, 自保、上位, 各有打算。 不過, 我經理「Mr.M」的風格和保羅不相稱。 多年工作經驗練出我的直覺, 今次 re-org, 我老細甚至全組可能會是高危一族。 如此情況, 正好給小弟深思一下自己的前景; 在此公司已工作了八年, 或者是時候轉換一下環境了。 一輪心思後, 寄出幾張 resume, 其中一間叫我面試。

這間公司是做電腦設計的, 曾幾可時有點名氣。 站在 technology 立場, 他們算是 cutting edge, 所以我是很想要這份工的。  睇中我 resume 是一位叫「阿宗」的香港人經理, 但他說我其實較啱另一部門。 正式面試, hiring manager 是個有 body-build 的印度人, 叫「阿P」, 自信硬朗型。  跟住見咗四個 engineers, 全是華人。 其中一個叫「阿偉」, 年齡看來大我十年, 好 nice, 隸屬「阿P」。 不過, 其中一個叫「阿玲」的女人, 有 attitude, 被佢窒到我呀。 好在她不是隸屬「阿P」, 而是隸屬「阿宗」, 只希望以後唔會同佢合作, 不過我呢個唸法實在太天真太傻啦。

後來「阿P」正式俾 offer, 同我格價和其他條件, 咁我只得一個特別要求, 就是職位個 grade 要夠 senior。 原因是在舊公司, 低 grade 的職位很容易被 outsource。 想不到此公司的文化完全不同, 我的憂慮是多餘的, 但我這個特別要求卻對我以後的工作有很大影響。 好啦, 返工不久便是「阿P」的 staff meeting, 第一次見晒成組人, 嘩, 完來呢度一個經理管有成十多人。  再嘩, 原來大半是印度人, 其餘全是華人。 呢個「阿P」都夠古惑, 搵班華人同我見工來引我落搭。 

老細先介紹每位組員, 那班印度人全是 fresh-grad 或工作三年以下, 但有兩個是 Ph.D, 華人的包括我在內都有十年工作以上經驗。 之後老細要 round-table, 每人講幾分鐘。 那些印度人後生可畏呀, 全都講到頭頭是道, 反而華人們講得有窒窒吓。 到我啦, 如大部港人, 個樣有點「嫩」, 但是老細提到我是很 senior 的。 所以成班印度人一面不相信似的, 十多隻眼睛望實我, 就等我開口說話。 這第一次的印象是很重要的, 我腦中不斷盤算, 究竟要怎樣講才能配合身份和給人良好形象呢? 

風林火山1 (待續) 

兩年前, 當決定離開工作了八年的舊公司, 心中是有千般盤算和百般擔憂的。 當時, 加入新公司有三個目標。 一, 學會和客户直接溝通的技巧; 二, 增加一門工程上的專項; 三, 能在這公司做到兩年。 可幸地, 現在它們也基本達到; 而不幸地, 公司將會炒兩成員工, 各人前景包括自己是絕不樂觀。 不過, 這正好給我一個理由回顧過去, 總結經驗。

在這間大公司工作了兩年, 最出我所料的, 是有機會接觸和學習 project management 和 team management, 但這方面的經歷也令我有很多不愉快的時刻。 一直想把這些事 blog 上, 但不知如何著筆。 一來講呢D嘢未必有人想理, 二來公開講負面嘢唔似我風格。 不過我唸, 這兩年工作上的感受是新鮮和刺激的, 無論我將來在那間公司或做什麼工作, 感覺也會不同。 所以值得寫下, 第二時自己睇番過吓癮都唔錯。 今次呢我又想搞搞新意思, 以故仔形式去寫, 回憶過程如實敘述, 細節和對話稍為老作以增加閱讀趣味, 希望能娛人娛己。

大公司的辨工室政冶, 其幻如風, 其淵如林, 危機如火, 頑固如山, 是為「風林火山」。

續上篇, 基督教最主要的教義是「信、望、愛」。 以信為大, 對信仰要有信心; 望次之, 要對生命有盼望; 然後是愛, 要愛人如己。 工作上, 尤其是工程研究項目,  我覺得也可應用到信望愛。 和佛教「苦集滅道」的應用有點不同, 「信望愛」主要是用在心理層面上, 目的是在變幻的工程進度中, 組員能維持專注, 發揮最大的工作效率。 信, 是要令組員對工程運作有信心, 對其他組員信任, 這方面我覺得主要靠良好的溝通。 能做到的, 交代唯和唯要做什麼, 不能做到的, 也要講清講楚; 那麼猜疑少了, 信心相對增加。 望, 是要令組員相信工程成功在望, 和要對成功後的獎賞有適量的慾望, 這是一種推動力。 信和望, 這兩點的效益是什明顯的。 而愛, 卻是最特別的一點, 我個人認為, 若能把「愛」發揮得好, 這是能完成困難工程的最關鍵要點。

愛, 在現今的商業競爭環境, 似乎風馬牛不相及, 之前我也從沒想過「愛」和工作能扯上什麼關係。 直至我讀了這本書: The Leadership Challenge.  這一是本傳統的混合個案研究和理論的書, 很多認真的英文書都是這種寫法, 令人讀時有趣味, 也能提供實用的資訊。 書中多個論點, 有聽過的也有未聽過的。 但去到最後, 作者給與一個最強烈的觀點, 就是大部份成功的領導者, 都是以愛行頭。 其實這個有點玄, 我自己也是在摸索之中, 所以不好明說。 但可想像一下, 身邊的同事或經理, 有沒有對員工或同事作真正的關心, 大家是可以感受得到的。 再想想, 如果上級能給與真誠的愛護, 大家會否更落力工作?  當然這引伸另一個問題, 在這現實的工作環境, 有沒有人會對同事或下屬付出真心關懷呢? 

由於母親是佛教徒, 而我是基督徒, 所以對兩種宗教也有較客觀的認識, 有時還把它們的道理應用到工作上。

佛教其中一門主要學問是「四聖諦」, 即為「苦集滅道」。 苦, 為人生中所有問題的分類, 共有八苦, 包括常聽見的: 生、老、病、死, 和比較少提的: 愛別離、怨憎會、求不得、五陰熾盛。集, 是為構成苦的原因, 概括為三種, 正是小說「天龍八部」常提及的: 貪、瞋、痴。 滅, 是解決「苦」和根斷「集」的理論, 最高層次為「涅槃」。 道, 是實踐理論的方法, 因為講易行難, 佛教提出八種方法, 是為「八正道」。 明白和修煉苦集滅道, 乃除卻痛苦以至成佛的唯一法門。

工作上, 尤其是工程研究項目,  我覺得也可應用到四聖諦。 先要確定「苦」, 問題所在。 再要找出「集」, 問題成因。 然後研究「滅」, 解決方案。 最後策定「道」, 落實行動項目。 不過, 人生的問題可能只有八苦, 工程問題我唸就不一定, 而且次次唔同, 鑊鑊新鮮鑊鑊甘。 再者工程項目會因進展而變化, 所以就算一早定晒「 苦集滅道」, 情況一變, 計劃便要修改, 有時這樣會很影響士氣。 所以, 我覺得「 苦集滅道」是為應用在工程項目的技術問題上, 若要確保工程順利行到終點, 還要另一層次的方法。 為此, 我借用了基督教的「信、望、愛」教義, 詳情下次再談。

呢個扑, 是用來紀念一張用了十多年的書桌。

90年代初, 剛來美國不久, 便和四位中學同學出來租了個apartment。 當時我和另一同學 share 一間房, 合買了一張99元的木書桌。 當時我兩是一人坐一邊, 晚晚一起讀書, 苦學生模樣。 後來同學搬走, 我便獨霸那張書桌, 我的 college 和大學生涯, 便是和它一起渡過。 學生時代,為慳錢年年都搬屋, 呢張書桌又重又大份, 所以次次都搬到我死死吓。

後來 relocate 到加州, 公司搵專人幫我搬屋, 咁我又叫佢地搬埋張書桌。 那時後, 我已不再要用它來讀書, 但我把証件之類放在它的抽屜中, 所以這書桌是很重要的。 之後又搬過幾次屋, 那時有點錢就請人搬了。 但記得有一次, 搬屋個哥哥仔笑說, 搬張咁舊嘅書桌, 搬運費還貴過它; 佢講嘅有道理但係我就冇理啦。

其實經過咁多年, 張書桌已經又殘又舊, 早陣子, 突然成個抽屜跌咗下來, 皆因 wore out, 木材已經破爛, $99 貨式捱到十多年算係咁。 不過, 上兩星期又搬屋, 今次決定唔要張書桌啦。 為了方便拋掉, 我把木板續塊拆除, 回想到當初把它 assemble 時, 老土講句, 十多年瞬間過去, 光陰似箭呀。